Aquí con rica manzana
escoyida, de raneta,
llénense cien mil toneles
y bébese por tarreña
que fará diez mil dedales
o cañitas de to tierra.

Aquí cuando la salú
Pierd'el home, y la pelleya
está a punto d'entregar
co la boquiá postrera,
lo que se fay ye llevalu
en coche, caballu o yegua
deprisa a Villaviciosa,
la flor, la mapa, la reina
de les villes d'esti mundo;
la que más llagares cuenta
que garbanzos da Castilla
y granos d'arroz Valencia.

Ond'al vellu, toi seguru...
pa qu'el tiempu no i provezca
d'amigos se ve rodiau...
y en una espicha soberbia
cuando arranca la tenaza
el taruquín de madera
y el chorru se ve de sidra,
solo con arrecendello,
con mirallo tan siquiera,
come com'un topineru,
sanu y contentu se queda.

Sidra... remediu devinu
qu'al mortal la vida allarga
y troc'al primer sorbiatu
la señaldú'n dolce calma.

Yo non sé por qué los méricos
viend'un probete na cama
que s'encueye o s'enduviella
co la máquina alteriada,
como'n sin perder menutu
no-i cuelen pe la garganta,
encioyando-i un embudu,
de sidra una bona xarra.

Non hay fiebre, llatidura,
cipela, niervu, nin llácara
que non fuxa, si arreciende
el zumu de la manzana.